GIPAMATUD-AN sa crowned 59th Miss Cagayan de Oro Alyssa Marie Cordova, 25 anyos sa Barangay Bugo, nga buhi ug sadya ang ‘Higalaay’ spirit sa Cagayan de Oro pinaagi sa tubag niini sa question-and-answer segment sa 2024 Miss CDO coronation night diha sa Atrium Limketkai, Agosto 24.

 

“As a proud and empowered Kagay-anon woman, I will forever carry the spirit of friendship wherever I go, because a true Kagay-anon believes that true friendship knows no boundary” ang tipik sa question-and-answer performance ni 2024 Miss CDO Cordova.

 

Nasakmit sa BS Accountancy student sa Pilgrim Christian College nga si Miss Cordova ang titulo isip ika-59 nga Miss CDO, ingon man ang titulo sa Best in Swimsuit, Best in Evening Gown, ug Best Gown Design nga ginama sa fashion designer nga si Mr. Boogie Musni Rivera.

 

Lakip sa adbokasiya ni Miss Cordova ang pagduso sa financial literacy ug edukasyon sa mga kabatan-onan.

 

Nahimong 1st runner up si Miss Barangay Macabalan, Princess Kyle Rufon; 2nd runner up si Miss Bayabas, Gabriella Gil Cristi Alaba kinsa nakuha usab ang titulo isip Darling of the Press; 3rd runner up si Miss Barangay 32, Desiree Gamolo; ug 4th runner up si Miss Barangay Consolacion, Jierecah Louise Nicole Taal.

 

Samtang gihatagan usab sa kahigayonan alang sa iyang final walk isip Miss CDO 2023 si Miss Vince Geophra Tormis.

 

Nidugang usab sa kasadya sa programa ang performance ni Asia’s Pop Heartthrob Darren Espanto ug milingkod isip guest judge si Miss Universe Philippines 2014 MJ Lastimosa.

 

Dako ang pasalamat sa kagamhanang lokal sa Cagayan de Oro sa pagpangulo ni City Mayor Rolando ‘Klarex’ Uy sa 20 ka mga maanyag nga kandidata, ingon man sa tanan nga nagsuporta ug nagpaluyo nga nagmalampuson ang gipahigayon nga 59th Miss Cagayan de Oro isip usa sa mga core events sa Higalaay Festival 2024. (AGP/Photos by Kim Zaldivar/CIO)