NAHIMONG overall champion gikan sa 11 ka contingents ang barangay Carmen sa ritual showdown sa Higalaay Festival Street Dancing Competition sa Pelaez Sports Complex, Agosto 26, 2024.

 

Isip kampyon sa ritual showdown, madawat sa barangay Carmen ang katibuk-an nga P400,000 pesos, samtang ang barangay Gusa nga nahimong 2nd runner up makadawat usab og P300,000 pesos, ug P200,00 pesos usab ang madawat sa barangay Baikingon nga midaog isip 3rd runner up.

 

Nakuha usab sa Carmen ang DITO’s choice award ug Minute Burger choice award.

 

Sa laing bahin, alang sa street dancing, nasakmit sa barangay Gusa ang 1st place ug midawat sa papremyo nga P50,000 pesos, 2nd placer ang barangay Puerto nga adunay papremyo P40,000 pesos, ug 3rd placer usab barangay Macabalan nga makakuha og P30,000 pesos.

 

Alang sa special awards nga adunay tag 20,000 pesos nga papremyo, nakuha sa barangay Carmen ang Best in Choreography ug Best in Storyline.

 

Nakuha sa Gusa ang Best in costume, Cugman ang nahimong most disciplined ug Baikingon ang nahimong Best in musicality.

 

Nagpasalamat si City Mayor Rolando ‘Klarex’ Uy sa aktibong partisipasyon sa mga barangay nga nagmalampuson ang Higalaay Street Dancing Competition ilabina sa 11 ka mga contingents gikan sa Nazareth, Canitoan, Clustered barangays, Carmen, Puerto, Bugo, Lapasan, Cugman, Baikingon, Macabalan ug Gusa.

 

Mapasalamaton usab si Mayor Klarex sa pagduyog ni 2nd District Congressman Rufus Rodriguez sa among kalihokan diin pamatuod sa panaghiusa sa dakbayan, kauban ang katawhan. (AGP/Photos by Reynan Baylin & Kim Zaldivar/CIO)