NASAKMIT sa Brgy Tablon ang unang ganti sa gipahigayong Fluvial competition adlaw’ng Miyerkules, Agosto 28, atol sa kapistahan ni Sr. San Agustin.

 

Nakadawat og P50,000 cash prize ang Brgy Tablon, gisundan kini sa Brgy Carmen isip second placer ug cash prize nga P30,000; ug Brgy Gusa isip 3rd placer nga nakadawat og P10,000 isip cash prize.

 

Ang Fluvial procession maoy kinauyokan sa tanang kalihukan sa Higalaay Festival diin gisalmotan kini sa siyam (9) ka competing barangays nga naglangkob sa Brgy Gusa, Carmen, Tablon, Macabalan, Bonbon, Bayabas, Cugman, Kauswagan ug Brgy 1.

 

Misalmot usab sa procession ang Ms. CDO 2024 kauban ang iyang entourage, mga miyembro sa 20th City Council sa pagpangulo ni Vice Mayor Bebot Rodriguez kauban usab si Congressman Rufus Rodriguez.

 

Samtang gipasalamatan usab ni Mayor Rolando “Klarex” Uy ang mga miduyog sa kasaulogan lakip ang Coast Guard, Maritime Industry, COCPO, 4ID, Philippine Ports Authority, Safer River Life Saver, ingon man ang Dragonboat CDO.

 

Sa mensahe ni Mayor Klarex iyang gipasalamatan ang katawhan sa kooperasyon ug pagtinabangay ingon man sa kinasingkasing nga suporta sa mga kalihukan sa syudad. (ACM/CIO Photos by Kim Zaldivar)