SUBLI nang mabati sa katawhan sa Cagayan de Oro ang nagkadaiyang batakang serbisyo ug programa nga gitanyag sa tibuok burukrasya sa City Hall matag adlaw’ng Sabado pinaagi sa Klarex nga Serbisyo sa Baryo, human sa usa ka semana nga temporaryong pagkansela niini nunot sa pagsaulog sa kapistahan ni Senyor San Agustin, ang patron sa Cagayan de Oro.

Gikompirma ni City Administrator Atty. Roy Hilario Roy Raagas nga ipahigayon ang sunod nga hugna sa KSB diha sa Barangay Bayanga karong Sabado, Agosto 31, diin unang ipahigayon ang Kasalan ng Bayan ug sundan sa hamubo nga programa.

Samtang, gi-anunsyo usab sa City Health Insurance Office nga mobalik na usab ang SurUy-SurUy sa Baryo: Klarex nga Serbisyo sa panlawas sunod semana, Setyembre 3 diha sa Barangay Bugo, ug Setyembre 5 diha sa Barangay Bonbon kauban ang KapKik caravan ni Barangay Carmen Chairperson Joaquin Kikang Uy. (AGP/CIO)