MOKABAT sa 247 ka nga Philhealth cards ug member data record (MDRs) ang gitunol sa kagamhanang lokal pinangulohan ni Mayor Rolando ‘Klarex’ Uy, kauban ang Philhealth Region 10 sa katawhan sa Barangay Bayanga atol sa gipahigayon nga ika-19 nga ikaduhang-hugna nga Klarex nga Serbisyo sa Baryo, Agosto 31, 2024.

 

Samtang kinatibuk-an nga 296 ka tawo usab ang naserbisyohan sa City Health Insurance Office nga mipaubos sa Philhealth profiling, medical consultation ug libreng tambal.

 

Tungod niini dakong kalipay ug pasalamat ni Bayanga Kapitan Felipe P. Baang kang Mayor Klarex uban sa tibuok sa city hall sa ikaduhang pagbalik sa Barangay Bayanga aron paghatag sa nagkadaiyang batakang serbisyo.

 

Agi’g pasalamat, lakip nagpaambit sa ilang pinasahi nga kulturanhong pasundayag ang mga kabatan-onang lumad diin nagpakita sa ilang kultura ug tradisyon sa natad sa produksyon ug pakigrelasyon. (AGP/Photos by Rod Constantino/CIO)