Sa tinguha nga makakat-on og bag-ong pamaagi aron mapausbaw pa ang mga programa ug serbisyo sa rehabilitasyon, mas gipalig-on pa karon sa City Anti-Drug Abuse Council (CADAC) ubos sa administrasyon ni Mayor Rolando `Klarex’ Uy ang Community-Based Drug Rehabilitation Program (CBDRP) sa nagkadaiyang barangay.

 

Gani man, bag-ohay lang mipailawom og capacity development activity ang mga CBDRP Managers gikan sa nagkadaiyang barangay ning syudad aron makat-onan ang mga strategies kalabot sa Prevention, Treatment ug Aftercare.

 

Gipasabot ni CADAC Co-Chairman City Councilor Romeo Calizo nga pinaagi sa pagpatuman sa maong mga strategies, makahatag og komprehensibo ug supportive environment ang mga programa sa rehabilitasyon alang sa mga indibidwal aron ilang maangkon ang malungtarong pagkaayo ug kahimsog.

 

Ang kalihokan gihingusgan pinaagi sa inisyatiba sa City Anti-Drug Abuse Division – Oro Wellness Center (CADAD –Oro Wellness Center) nga gipangulohan ni Dr. Rhyselle Bernadette Melliza-Descallar.

 

Samtang gipasalamatan usab sa CADAC ang speaker sa maong kalihokan nga si Ian Cid Descallar, consultant sa Sober Avenue for Behavioral Health (SABH) ug kasamtangang Addictions Counsellor of Chabad Lifeline Wellness Center sa Montreal Quebec, Canada. (ALR/CIO/Photos from CADAD-Oro Wellness Center)