GIHINGUSGAN sa City Health Office ang kampanya batok dengue sa tinguha nga mapugnagn ang pagsaka sa ihap sa kaso dinhi sa syudad.

 

Sa mensahe ni City Health Officer Dr Rachel Dilla, iyang gipasabot ang kamahinungdanon sa paglikay nga mapaakan sa Aedes Aegypti nga lamok nga maoy nagdala sa dengue.

 

Matud ni Dr Dilla, mubo ra og kinabuhi ang lamok apan paspas ug daghan ang mahimong itlog niini kung makakita og kahigayonan nga iyang maitlogan.

 

Tungod niini, mahinungdanon ang panaghiusa sa komunidad ilabina sa paghinlo sa palibot.

 

“Ang kinabuhi sa lamok mubo ra kaayo, usa ra ka bulan, pero sa dihang maabot ug usa ka semana, mahimo na siyang manganak ug makapanganak ug hangtod sa 200 ka itlog,” matud pa ni Dr. Dilla.

 

Basi sa datus sa City Health Office adunay natala nga kapin sa libo nga mga kaso sa dengue ang Cagayan de Oro gikan Enero hangud Agosto ning tuig ug mas taas kini nga ihap kompara sa milabay’ng tuig nga aduna lamang dili moubos sa 500 ka kaso sa susamang mga bulan.

 

Subay niini, nanawagan ang City Health Office sa katawhan sa pagtuman sa 5S: Search and Destroy; Seek Early Consultation; Secure Self Protection; Support Indoor/Outdoor fogging; ug Sustain Hydration. (MS/CIO)