Gikumpiska sa mga personahi sa City Veterinay Office ang upat ka lechon baboy human wala nakapakita og igong dokumento ang lechonero nga mao usab ang tag-iya sa maong mga lechon.

 

Gibutyag ni City Veterinarian Dr. Perla Asis nga nag-operate og lechonan ang tag-iya nga molupyo sa Piaping Itum Barangay Macabalan nga walay business permit.

 

Nasayran nga nakadawat og taho ang City Vet kalabot sa mga baboy nga gipalit didto sa Maramag Bukidnon nga nisulod dinhi sa syudad nga walay dokumento nga gimando sa Department of Agriculture (DA) AO5-2019 ug local EO 103-2020: Veterinary Health Certificate (VHC), Shipping Permit, ug Recognition of Active Surveillance (RAS) alang sa African Swine Fever (ASF) for backyard hogs.

 

Gani man, gitambagan sa Barangay Biosecurity Officer (BBO) sa Macabalan ang lechonero nga maghuwat sa mga personahi sa City Vet aron mahibaw-an ang angay buhaton apan wala kini nagpatuo, hinuon gipadayon ang pag-ihaw sa baboy ug pag-lechon niini pagka sunod adlaw.

 

Ang BBO mao ang personahi nga gi-deputized sa City Vet pinaagi sa City Ordinance No. 14532-2023 o Babay ASF Ordinance nga magpahigayon og surveillance and monitoring sa hog movement sa barangay level.

 

Sa pakisusi, wala nakapakita sa gikinahanglang dokumento ang lechonero gawas lang sa barangay certification gikan sa Maramag Bukidnon.

 

Alayon niini, gipasalamatan sa City Vet ang Barangay Macabalan pinangulohan ni Punong Barangay Saniel L. Raypon tungod sa ilang dinaliang aksyon.

 

Samtang sa susamang insidenti, mokabat og 11 kilos nga lechon baboy ang nakumpiska sa City Vet diha sa Buena Oro Barangay Macasandig human nasayran nga “hot meat” kini.

 

Ang mga nakumpiska gidala sa police station alang sa documentation usa kini gidala sa Barangay Pagatpat aron ilubong subay sa sanitary regulations. (ALR/CIO/Photos from City Vet)