GIDAYEG ug gipasalamatan ni City Mayor Rolando ‘Klarex’ Uy ang mga kawani sa Barangay Indahag, mga barangay health workers, barangay nutrition scholars, barangay tanod, community development volunteers, ug uban pang mga barangay-based volunteers pinangulohan ni Kapitan Marlon Fidel Bongay Jr., sa ilang kaikag sa pagserbisyo sa katawhan sa Indahag.

 

Kini ang giluwatan nga pamahayag sa mayor atol sa pagsalmot niini sa flag raising ceremony sa Brgy Indahag, Septyembre 9, 2024.

 

Isip pila ka tuig nga nangatungdanan isip Kapitan sa Carmen, gihingusgan ni Mayor Klarex ang kamahinungdanon sa pag-ila sa paningkamot sa matag barangay alang sa kalamboan sa tibuok dakbayan.

 

Gani man, gipaambit ni Mayor Klarex nga tungod sa hugot nga suporta sa mga kabarangayan, nasakmit sa syudad bag-ohay lang ang top 6 Most Competitive Highly Urbanized City sa overall ranking sa 2024 Cities & Municipalities Competitiveness Index kon CMCI.

 

Kahibaloan nga naila ang liderato ni Mayor Klarex nga ‘people-centered/service-oriented’ sama sa programa niini matag adlaw’ng Sabado nga Klarex nga Serbisyo sa Baryo, matag Myerkules nga ‘Peoples Day’ diha sa city hall quadrangle, ug Martes ug Huwebes nga Klarex nga Serbisyo sa Panlawas: Suroy-Suroy sa Baryo. (AGP/Photos by Roel Felicitas/CIO)