Naghiusa karon ang lokal nga kagamhanan sa syudad sa Cagayan de Oro ug Zamboanga nga mapatuman ang traffic road safety alang sa katawhan ilabina sa mga kabataan human mipirma og Sister-City Partnership on Road Safety, Sept. 7, 2024.

 

Mitambong sa maong signing ang mga miyembro sa 20th City Council sa pagpangulo ni Majority Floor Leader City Councilor Edgar Cabanlas nga maoy mi-representar ni Mayor Rolando `Klarex’ Uy.

 

Anaa usab ang presensya sa pipila ka mga department managers pinangulohan ni City Administrator Atty. Roy Hilario Raagas, Mayor’s Chief of Staff Sheila Lumbatan.

 

Samtang ang Zamboanga contingent gipangulohan nila ni Mayor John M. Dalipe, ug Vice Mayor Josephine E. Pareja.

 

Ang sisterhood agreement tali sa mga lokal nga kagamhanan naglatid sa ilang pasalig nga mapanalipdan ang mga bata gikan sa posible nga kamatayon ug pagkaangol tungod sa mga aksidenti sa dalan.

 

Basi sa datos sa gobyerno labing menos 1,600 ka mga batang Pilipino ang nangamatay sa mga aksidenti sa kadalanan matag tuig.

 

Ang mga opisyal sa duha ka mga syudad misaad sa hugot nga pagpatuman sa mga lagda sa trapiko, maayong pagbansay ug mga ekipo alang sa traffic enforcers, ug pagbutang og mga speed limits ug protective barriers sa palibot sa mga eskwelahan ug dulaanan.

 

Ang maong pagtambayayong naghatag usab og mga mekanismo sa pagpaambit sa labing maayong gawi sa kaluwasan sa dalan tali sa duha ka syudad.

 

Lakip sa mitambong ug misaksi sa signing si Dr. Angelito M. Umali, MD, UNICEF Program Officer, ug mga opisyal sa Imagine Law. (ALR/CIO/Photos by Kim Zaldivar & Roel Felicitas/CIO)