GIHINGUSGAN ni City Mayor Rolando ‘Klarex’ Uy, atubangan sa mga kawani ug katawhan sa barangay Bayabas ang kamahinungdanon nga mapahimuslan sa kabarangayan ang nagkadaiyang programa nga gitanyag sa kagamhanang lokal sa Cagayan de Oro.

 

Giluwatan ang pamahayag ni Mayor Klarex atol sa pagsalmot niini sa flag-raising ceremony diha sa Barangay Bayabas sa pagpanguna ni Kapitan Rudy Lago, Septyembre 16, 2024.

 

Kahibaloan, matag adlaw’ng Lunes naninguha si Mayor Klarex nga makatambong sa sinemanang pagpakayab sa nasudnong bandila sa matag barangay isip pag-ila niini sa dakong papel sa kabarangayan alang sa kinatibuk-an nga kalamboan sa syudad.

 

Nanawagan usab kini sa katawhan nga pahimuslan ang programa sa syudad sama sa city scholarships program, mga outreach program sama sa Klarex nga Serbisyo sa Baryo ug SurUy-SurUy sa Baryo, ug matag Myerkules nga People’s Day.

 

“Ang tinguha sa usa ka ginikanan nga likod sa iyang kapobrehon adunay gobyerno nga iyang malaoman nga makatapos ang iyang anak”, tipik sa mensahe ni Mayor Klarex. (AGP/Photos by Roel Felicitas/CIO)