Nagkadaiyang mga problema kalabot sa gipatuman nga bag-ong ruta sa mga modernized public transport ang gipaminaw ni Mayor Rolando `Klarex’ Uy atol sa gipahigayon nga meeting sulod sa iyang buhatan Lunes Sept. 30.

 

Tulo ka transport group ang mipadayag sa nagkadaiyang problema kalabot sa bag-ong ruta ug naghangyo kang Mayor Klarex nga sila matabangan aron masulbad kini.

 

Si Mayor Klarex nagpasalamat sa mga transport group sa pagbisita sa iyang buhatan alang sa maong panagtigom.

 

Gipasabot sa mayor nga iyang paningkamutan nga matabangan ang tanan ug pangitaan og paagi aron mahatagan og kaangayan ang matag grupo ilabina ang kinabag-ang katawhan nga apektado sa problema.

 

“Apan dili tanan nga inyong gusto maoy masunod busa ako mangayo sa gamay nga pagsabot ug pagsakripisyo,” dugang ni Mayor Klarex.

 

Si Atty. Jose Edgardo Uy, co-chairman sa Regulatory Compliance Board (RCB) mao ang nag-preside sa maong tigom basi sa kamanduan ni Mayor Klarex diin anaa usab sila si Engr. Nonito Oclarit, Dep’t Manager sa Roads and Traffic Administration (RTA), ingon man ang representante sa Land Transportation Franchising and Regulatory Board (LTFRB-10).

 

Samtang gihangyo usab ni Atty. Uy ang mga miyembro sa transport group nga suwayan pagsunod ang bag-ong mga ruta aron hingpit nga ma-obserbahan ug makita ang problema. Ug kung unsa ang angay buhaton nga solusyon aron masulbad ang nagkadaiyang mga isyu nga giatubang. (ALR/CIO/Photos by Kim Zaldivar/CIO)