Gipatawag sa Night Market Management Committee (NMMC) ang mga sidewalk vendors, ug mga masahista nga person with disabilities (PWDs) ug dili PWDs nga anaa sa Divisoria nakapuwesto aron ipahibalo ang gikatakdang re-development sa Divisoria hinungdan nga temporaryo kining siradohan.

 

Ang maong mga sidewalk vendors ug mga masahista ang maapektuhan sa pagsirado alayon sa pagpatuman sa Project Lunhaw.

 

Si Atty. Jose Edgardo Uy, chairman sa Regulatory Compliant Board (RCB) ug usa sa opisyal sa Night Market mipasabot sa mga apektadong sidewalk vendors nga hatagan sila og higayon nga makapamaligya apan sa lahi na nga puwesto.

 

Gidasig sila ni Atty. Uy nga magsulat sa Night Market Management Committee ug moatubang ni Mayor Klarex atol sa People’s Day sa adlaw’ng Miyerkules aron ipaabot ngadto sa mayor ang ilang tumong.

 

Dugang ni Atty. Uy nga daghan pa og bakante ang Carmen Market, ug mapangitaan pa usab og paagi ang Cogon Market ingon man sa Gaston Park. (ALR/CIO/Photos by Rod Constantino/CIO)