Gidayeg ni Mayor Klarex Uy ang mga paningkamot ug sakripisyo sa mga department managers sa city hall nga nagbunga og daghang kadungganan nga naangkon sa dakbayan sa Cagayan de Oro.

 

Sa ilang binulan nga tigom sa Management Committee kon ManCom sa usa ka hotel ning syudad, Martes, Oktubre 15, gipadayag ni Mayor Klarex ang iyang pagpasalamat sa gipakitang kakugi sa tanang department managers.

 

“Daghan kaayong salamat sa daghang kadungganan nga nadawat sa dakbayan. Ang inyong mga paningkamot, paninguha ug sakripisyo nagmabungahon kaayo ug wala nasayang. Kanang mga kadungganan dili na sa ato, apan sa katawhan sa dakbayan,” pamahayag sa mayor.

 

Si Mayor Klarex nagkanayon nga taas ang iyang pagsalig sa mga department managers diha sa ilang pagtuman sa mga kaakuhan ug katungdanan sa pagserbisyo sa katawhan sa dakbayan.

 

“Gibutang mo nako diha tungod kay giila mo nako nga masaligan, ug adunay katakus sa pagtrabaho nga kinasing-kasing sa pagpangalagad sa atong katawhan,” panapos sa mayor. (CIO/photos by Kim Zaldivar)