Girekomendar nga tangtangon sa trabaho ang usa ka job order nga trabahante sa Civil Security Unit (CSU) sa city hall human kini nalambigit matud pa sa pagpamaligya og ilegal nga droga.

 

Ang 34 anyos nga kawani sa CSU ubos sa City Mayor’s Office anaa kasamtangan nadestino sa Boy Scouts Building sa Barangay 40 ning syudad.

 

Ang rekomendasyon nga ‘termination of work’ batok sa lalakeng empleyado giluwatan ni Mr. Florencio A. Bagaipo Jr., acting head sa CMO-CSU, alang sa tukmang aksyon ug disposisyon ni City Administrator Atty. Roy Hilario P. Raagas.

 

Ang nahisgutang kawani nasikop bag-ohay lang sa mga tinugyanan sa Police Station 4 Carmen ug Philippine Drug Enforcement Agency (PDEA-10) atol sa drug buy-bust operation nga gipahigayon sa Gumamela Extension, barangay Carmen ning syudad.

 

Ang suspetsado anaa na karon sa kustodiya sa Police Station 4 Carmen alang sa pagpasaka sa tukmang kaso. (CIO)