ALAYON sa paghandum sa All Saints, Souls Day, gipahibalo sa City Local Environment and Natural Resources Office (Clenro) nga gidili ang pagdala og mga plastic bottles o bottled water sa pagsulod sa City Memorial Park sugod Oktubre 31 hangtud Nobyembre 2 ning tuig.

 

Hinuon, sa gipagulang ‘advisory’ sa Clenro, giaghat ang tanang mobisita sa ilang mipanaw nga minahal sa kinabuhi nga magdala lamang og mga tumblers sanglit magtanyag ang kagamhanang lokal sa libreng tubig pinaagi sa mga dispensers nga iplastar sa mga piling dapit sa City Memorial Park.

 

Lakip sa gipagulang kamadoan nga nalatid sa Executive Order 439-2024 nga gidili ang pagbaligya og bisan unsang refreshements sama sa juice, tubig, ilimnong makahubog, mineral water sulod ug palibot sa City Memorial Park o kanhi Bolonsiri cemetery.

 

Gipahibalo usab sa Clenro nga abli ang memorial park sugod alas 6:00 sa buntag hangtud alas 10:00 sa gabii lamang.

 

Kini pinasubay usab sa Executive Order No. 429-2024 nga gipagula ni Mayor Rolando “Klarex” Uy isip general guidelines aron masiguro ang kahinlo ug siguridad sa katawhan nga mobisita sa mga pribado ug pampublikong sementeryo. (ACM/CIO)