Walo ka boksidor sa Cagayan de Oro City Amateur Boxing Team ang nagmalampuson sa ilang pagsalmot sa bag-ohay natapos nga International School Sport Federation (ISF) sa nasud sa Bahrain human mihakot ang boxing team sa syudad og usa ka gold, upat ka silver ug tulo ka bronze medal.

 

Tungod niini, nagpasalamat si Cagayan de Oro City Amateur Boxing Team head coach Elmer Pamisa sa suporta ni City Mayor Klarex Uy, pinaagi sa City Sports Development Office ubos sa pagpangulo ni Allby Cris Waga.

 

Ang nag-inusarang gold medalist mao si Christian Jake Pores (48 kgs), samtang ang mga silver medalist mao sila si Shairylle Pores (women’s 46 kgs), Ever Joy Nuez (women’s 48kgs), John Michael Estorba (52 kgs) ug Joel Rosas Jr. (54 kgs).

 

Ang tulo ka mga bronze medalist mao sila si Ivan Llaban (46 kgs), Sherwin Villanueva (51 kgs) ug Argie Reyes (57 kgs).

 

Gikalipay ni coach Pamisa, kauban si coach Fernie Lou Abing, ang gipakitang katakus ug abilidad sa nahisgutang mga boksidor, nga nag-edad 15 hangtud 18 anyos, sanglit kini ang unang higayon nga sila misalmot sa usa ka international boxing competition.

 

Naka-agbat sa mga boksidor sa syudad ang mga bangiitang boksingero sa nasud sa Kazakhstan, Ukraine, Azerbaijan, Hungary, Brazil, Saudi Arabia, Qatar, United Arab Emirates, Nepal, Canada, Armenia, Taipei, Cyprus ug Romania. (CIO/photo courtesy of coach Pamisa)