DAKONG garbo ug kalipay sa pamunoan sa City College of Cagayan de Oro (CCCDO) sa pagpangulo ni Dr Jestoni P. Babia, college interim president, sa pagdawat sa Certificates of Program Compliance (COPCs) gikan sa Commission on Higher Education (CHED) Region10 alang sa kursong Bachelor of Technical Vocational Teacher Education (BTVTED) ug Bachelor of Technology Livelihood Education (BTLED) adlaw’ng Miyerkules, Oktubre 30 ning tuig.

 

Matud ni Dr Babia, talagsaon ug labing unang city college nga nahatagan og COPC sa tibuok nasud bisan pa man og halos usa ka tuig pa lamang kini gikan sa pagkamugna, sanglit kasagaran sa mga nag-apply alang sa COPC anaa na sa ilang ikaupat nga pagkahimugso.

 

Ang maong kadaogan sa city college nagpamatuod lamang sa lawom nga panglantaw niini nga maghatag og de kalidad nga edukasyon sa mga Kagay-anon.

 

Samtang mapasalamaton usab ang CCCDO kang Mayor Rolando “Klarex” Uy kansang liderato nahimong instrumento nga makabaton og libre’ng edukasyon ang kabatan-onan ingon man usab ang pasalamat sa city college kang Councilor Suzette Magtajas-Daba, chairman sa committee on Education sa 20th City Council sa makanunayong suporta ug paningkamot alang sa maong kalamboan.

 

Ang maong kalamboan usab bunga sa paningkamot ug pagtinabangay sa Academic Affairs team sa pagpangulo ni Dr. Ma Aira Chenessa Aguilar uban sa suporta sa mga college dean ug program chairs sa pag-andam ug pagtubag sa mga rekisitos nga gipangayo sa CHED.

 

Tungod niining maong COPC mahimo nang magtanyag ang city college og dugang 4-year course nga mahimong mapilian sa mga buot motungha ug makatapos sa kolehiyo nga libre.

 

Dugang pa niini, kwalipikado na usab ang CCCDO sa pagtanyag og CHED scholarships alang sa mga estudyante. (ACM/CIO/CCCDO Photos)