NANUMPA na sa katungdanan ang labing unang City College of Cagayan de Oro (CCCDO) president nga si Dr. Jestoni P. Babia kang Mayor Rolando “Klarex” Uy adlaw’ng Lunes, Nobyembre 4, 2024 atol sa pagpakayab sa nasudnong bandila sa Brgy Carmen ning syudad.

 

Si Dr. Babia, kinsa mao usab ang interim college president, ang napiling presidente sa CCCDO subay sa proseso ug guidelines nga gihatag sa Commission on Higher Education (Ched) diin magsilbi kini sulod sa upat (4) ka tuig human usab sa suporta sa Governing Board pinaagi sa Search Committee niini.

 

Mitapos sa kolehiyo sa kursong Bachelor of Science in Education, major in Special Education isip Magna Cum Laude sa Xavier University-Ateneo de Cagayan ug nagpadayon pagtuon sa Cebu Normal University alang sa Master of Arts in Education diin niani og high honors ang iyang exceptional thesis work ug mitapos pa gayud og Doctor of Education (EdD) specializing sa Instruction Systems and Resource Management sa University of San Jose-Recoletos.

 

Nagsilbi usab nga Director sa ESD Center for Research Training and Development ug Assistant Vice President for Academics si Dr Babia sa USJ-R samtang mas giplalambo pa niini ang iyang kahanas sa dihang nahimo usab siyang Teacher Education Council Visayas Representative, diin dako og impluwensiya sa national policy alang sa inclusive education ug nagsilbi pa gayud kini isip ESD Consultant sa UNESCO National Commission of the Philippines.

 

Subay niini, dako usab ang pasalamat sa CCCDO ug ni Dr Babia sa suporta ni Mayor Klarex ug City Councilor Suzette Magtajas-Daba alang sa kalamboan sa city college. (ACM/CIO Photos by ROEL FELICITAS)