GIHANGYO karon ni City Disaster Risk Reduction Management Department (CDRRMD) Manager Nick Jabagat ang publiko nga motaho gilayon sa ilang buhatan kung adunay masaksihan nga aksidente sa kadalanan o bisan unsang matang sa emerhensya pinaagi sa pagtawag sa ilang emergency hotline nga 911.

 

Ang hangyo gihimo ni Jabagat sa tuyo nga paspas ug dali ang pag-responde ug pagtubag sa mga personahe sa CDRRMD panahon sa tawag-emerhensya gikan sa mga residente sa dakbayan nga nanginahanglan og dinalian nga tabang o’ emergency assistance.

 

Gipasabot ni Jabagat nga importante kaayo nga matawagan ug mapahibalo sa sayong panahon ang Oro Rescue 911 aron marespondihan ang panghitabo tungod kay nag-ungaw ang kinabuhi sa mga biktima sa matag gutlo o’ minuto nga molabay human sa aksidente o’ emerhensya nga sitwasyon. (CIO)