GIPAHALIPAYAN ug gipasalamatan ni Mayor Rolando `Klarex’ Uy ang 20 ka mga Plea Bargain clients human malampuson nilang gitapos ang unom ka bulan nga pagpailawom sa Community-Based Drug Rehabilitation (CBDR) ug Aftercare program sa City Anti-Drug Abuse Council (CADAC).

 

Sa mensahe ni Mayor Klarex nga gipadangat pinaagi ni City Administrator Atty. Roy Hilario Raagas siya naglaum nga pinaagi sa maong programa mahimo kini nga kasangkapan nga magamit aron mahimong mapuslanon nga sakop sa ilang barangay ug sa komunidad.

 

Samtang gihagit usab ni CADAC co-chair City Councilor Romeo Calizo ang mitapos nga mga clients nga hatagan og bili ang ilang kaugalingon ug pamilya aron dili na mobalik sa ilang dili maayo nga kasinatian.

 

Si Dr. Rhyselle Bernadette Melliza-Descallar, head sa City Anti-Drug Abuse Division – Oro Wellness Center (CADAD – Oro Wellness Center) midasig sa mga milampos nga hunahunaon kanunay ang ilang mga desisyon ug higugmaon ang ilang kaugalingon alang sa hingpit nga kabag-ohan. (ALR/CIO/Photos by Kim Zaldivar/CIO)