Girekognisar karon ang dakbayan sa Cagayan de Oro ubos sa liderato ni City Mayor Rolando ‘Klarex’ Uy isip modelo o’ mentor human napili sa Galing Pook Foundation ang dakbayan isip usa ka ‘governance hub’.

 

Kini ang gipahibalo ni Mr. Adrian H. Adove, ang Interim Executive Director sa Galing Pook Foundation sa iyang sulat-pahibalo nga gipadangat ngadto kang Mayor Klarex Uy bag-ohay lamang.

 

Sa iyang tubag, gipadayag ni Mayor Klarex ang iyang dakong garbo ug kalipay nga nahimong ‘governance hub’ ang dakbayan ubos sa proyektong ‘Better Governance Without Borders: Promoting Collective Action Through the Cagayan de Oro City and Tagum City Governance Hubs’.

 

Kini nga proyekto gipundohan sa United States Agency for International Development kon USAID pinaagi sa Cities for Enhanced Governance and Engagement (CHANGE) Project, diin nahimong pilot city ang Cagayan de Oro City.

 

Ipatuman ang proyekto gamit ang ‘hubs-and-spokes’ approach, diin ang dakbayan sa Cagayan de Oro magsilbing ‘hub’, samtang ang mga kasikbit nga munisipalidad mahimo usab nga ‘spoke’ sa tuyo nga makab-ot ang ‘responsive, participatory, and collaborative local governance’.

 

Isip modelo ug nahimong awardee sa Galing Pook Awards, ipasinati sa Cagayan de Oro ngadto sa mga munisipalidad ang iyang mga ‘best practices’ ug dalaygon nga kasinatian diha sa pag-implementar sa CHANGE project. (CIO)