GIPASIDUNGGAN ang kagamhanang lokal sa Cagayan de Oro ubos sa administrasyon ni Mayor Rolando ‘Klarex’ Uy pinaagi sa City Leadership Team (CLT) isip ‘Global Self-Reliant City’ nunot sa lig-on ug halapad nga programa sa family planning ug Adolescent Sexual and Reproductive Health (ASYRH), Nobyembre 28, 2024.

 

Ang maong pasidungog gitunol sa The Challenge Initiative – Zuellig Family Foundation (TCI-ZFF) atol sa gipahigayon nga panagtapok sa mga partner-cities sa tibuok nasod didto sa kaulohan.

 

Nasayran nga ang programa alang sa kaayuhan sa mga kabatan-onan ug matag pamilya ang usa sa mga gitutokan ni Mayor ‘Klarex’ pinaagi sa Rise CDO development agenda niini.

 

Tinguha sa mayor nga pinaagi sa tabang sa nagkadaiyang mga buhatan/ahensya ug sa katibuk-an nga City Leadership Team makunhoran ang suliran sa ‘adolescent birth rate’ o ‘teenage pregnancy’ ingon man ang ‘repeated teenage pregnancy’, ug uban pang mga isyu sa mga kabatan-onan.

 

Ang City Leadership Team gilangkoban ni Mayor Klarex, City Administrator, City Health Office, JR Borja General Hospital, Lumbia Infirmary, City Social Welfare and Development, Community Improvement Division, Commission on Population and Development, Department of Health, City Technical Lead CDO -Iligan TCI-ZFF. (AGP/Photo courtesy of OYDO)