NAKABATON na ang syudad ubos sa administrasyon ni Mayor Rolando `Klarex’ Uy og Biosecured Swine Facility human kini gitunol sa Department of Agriculture Regional Field Office-X (DA RFO-X) bag-ohay lang.

 

Si Acting City Veterinarian Dr. Helen Ann Tacandong mipasabot nga ang facility kabahin sa Integrated National Swine Production Initiative for Recovery and Expansion (INSPIRE) Program sa Barangay Tuburan.

 

Kini nga facility gi-desenyo aron matabangan ang mga local swine farmers nga makabangon ug makabawi gikan sa epekto sa African Swine Fever (ASF) ug mapalapdan nga luwas ang ilang produksyon.

 

Gidugang ni Dr. Tacandong nga makatabang usab kini nga mapugngan ang pagkuyanap sa sakit sama sa ASF pinaagi sa improved biosecurity measures, samtang nagpasiugda usab kini og malungtarong produksiyon sa kahayupan sa syudad.

 

Kini nga inisyatiba kabahin sa padayon nga paningkamot sa gobyerno nga masuportahan ang lokal nga industriya sa baboy ug masiguro nga makabawi ug motubo kini.

 

Ang turnover ceremony gitambongan nila ni City Councilor Jay Roa Pascual, DA Regional Executive Director Jose Apollo Y. Pacamalan, mga department managers sa city hall, ug mga bisita. (ALR/CIO/Photos from City Vet)