MALAMPUSONG gipahigayon sa kagamhanang lokal sa Cagayan de Oro ubos sa administrasyon ni Mayor Rolando ‘Klarex’ Uy, pinaagi sa Office for Community Affairs – Volunteerism and Active Citizenship Program ang labing-una nga ‘National Volunteer Expo 2024’ diha sa Centrio Ayala Mall activity center, Disyembre 3, 2024, isip kabahin sa month-long celebration alang sa bolunterismo.

 

Dumduman niadtong Disyembre 1 miduyog ang mga tinugyanan sa Philippine National Volunteer Service Coordinating Agency sa pagpangulo ni Executive Director Donald James D. Gawe alang sa pormal nga pagbukas sa National Volunteer Month karong bulan sa Disyembre.

 

Ang maong kalihokan hugot usab nga gisuportahan sa buhatan ni Mayor Klarex, Gender and Development, PNVSCA, Ayala Foundation ug uban pang mga stakeholders.

 

Dungan usab nga gipahigayon sa Volunteer Expo ang blood donation drive ‘Dugong Kagay-anon Year 2’ kauban ang Philippine National Redcross Misamis Oriental – Cagayan de Oro chapter.

 

Nagpasiugda usab ang Public Employment Service Office ug City Anti-Drug Abuse Division – Oro Wellness og ‘Uswag Opportunities’ job and opportunity fair diin gisalmotan sa 10 local employers ug 2 overseas agencies.

 

Samtang nagkatapok usab ang mga nagkadaiyang mga ahensya sa gobyerno, civil society groups ug mga volunteer organizations sama sa Global Initiative for Exchange and Development Inc., Kusgan Volunteers, Inc., Young Men’s Christian Association – CDO, Andam Higala Inc., Life Project 4 Youth, ug Kagay-anon Youth Network Alliance alang sa volunteer engagement forum. (AGP/Photos by Roel Felicitas & Reynan Bayllin/CIO)