Mipadayag si Mayor Rolando 'Klarex' Uy sa iyang dakong pasalamat ngadto sa tanan nga mihatag sa ilang suporta ug kooperasyon human nagmalampuson ug malinawon ang National Rally for Peace sa Iglesia ni Cristo dinhi sa Cagayan de Oro karong adlawa.
Partikular nga gipasalamatan sa mayor ang sobra 30 mil ka mga miyembro sa INC nga misalmot sa kalihukan diha sa Plaza Divisoria.
Nagpasalamat usab si Mayor Klarex sa pagsabot sa mga motorista ug negosyante kinsa naapektohan sa pagsirado sa mga dalan ug pagpatuman sa signal jamming palibot sa Divisoria atol sa rally.
Lakip sa gipasalamatan sa mayor ang mga pampublikong tunghaan sa elementarya ug sekondarya nga misanong sa iyang pag-suspenso sa klase.
Kinasing-kasing usab nga gipasalamatan ni Mayor Klarex ang mga sakop sa prensa tungod sa ilang papel sa pagpahibalo sa katawhan sa mga importanteng impormasyon.
Gidayeg usab ni Mayor Klarex ang paningkamot sa mga buhatan sa city hall aron mapatunhay ang kahusay, kalinaw ug kalimpyo sa peace rally.
Kini naglakip na sa Roads and Traffic Administration (RTA), City Disaster Risk Reduction and Management Department (CDRRMD), City Local Env't and Natural Resources Office (CLENRO), City Public Services Department (CPSD), JR Borja General Hospital (JRBGH), City Mayor's Office (CMO), City Information Office (CIO), Cagayan de Oro Police Office (COCPO), Task Force Oro ug uban pa.