Gilugwayan karon ang business permit renewal gikan Enero 20, 2025 hangtud Pebrero 28, 2025.

 

Kini human giuyonan sa 20th City Council ang City Ordinance No. 2025-670 subay sa rekomendasyon ni City Mayor Rolando ‘Klarex’ Uy nunot na usab sa hangyo sa duha ka dagkong hugpong sa mga negosyante dinhi sa syudad atol sa ilang regular session, adlaw’ng Lunes, Enero 20 nga gidumala ni Bise Mayor Jocelyn ‘Bebot’ Rodriguez.

 

Sa ilang hiniusang sulat-hangyo nga gipadangat ngadto sa mayor, mihangyo og extension sa deadline sa business permit renewal sila si Cagayan de Oro Chamber of Commerce and Industry Foundation (ORO CHAMBER) President Engr. Almarco C. Brito ug Misamis Oriental Filipino-Chinese Chamber of Commerce and Industry, Inc. (MOFCCCII) President Efren T. Uy.

 

Gipasabot sa duha ka opisyal nga importante kaayo ang konsiderasyon sa syudad sa ilang hangyo, ilabina nga daghan pa sa ilang mga miyembro ang nag-atubang karon sa daghang mga hagit sa negosyo ug kalisdanan sa aspetong pinansyal.

 

Sa gihatag nga lugway hangtud Pebrero 28, kampante ang duha ka grupo nga matubag sa ilang mga miyembro ang mga kaakuhan ug obligasyon isip mga negosyante sa dakbayan, samtang ilang gipadayag ang hugot nga suporta ug pakigtambayayong sa liderato ni Mayor Klarex Uy alang sa ekonomikanhong kalamboan sa dakbayan sa Cagayan de Oro. (CIO/photo by Jason Adaza-BPLD)