Dako ang pasalamat ni City Mayor Rolando ‘Klarex’ Uy sa gipakitang tabang ug hugot nga kooperasyon sa mga kapitanes ning syudad nunot sa iyang panawagan nga mahatagan sa dinaliang aksyon ug kasulbaran ang isyu sa basura karong panahona.

 

Kini human kusganong misanong ang mga kapitanes sa city-wide garbage collection drive nga gisugdan karong adlawa ug gipangunahan sa Task Force Basura ubos sa pagpangulo ni City Administrator Atty. Roy Hilario Raagas.

 

Tuyo sa city-wide garbage collection drive nga mahipos ug mahinlo sa daling panahon ang mga basura sa tibook syudad nga nakasinati sa dili tiaw nga pagsaka ang gidaghanon pagkahuman sa bag-ong tuig.

 

Sa katiguman kagabii kauban si Mayor Klarex, nagkahiusa ang tingog sa mga kapitan, ilabina kadtong adunay kaugalingong garbage trucks, nga motabang sa task force ug Tencil, ang third-party private garbage collector sa syudad, sa paghakot sa mga basura.

 

“Hinaut magtinabangay kitang tanan aron mahibalik na sa normal ang pagkolekta sa basura sa dali nga panahon,” panawagan sa mayor sa mga kapitan nga mitambong sa tigom.

 

Si Atty. Raagas namahayag nga ang city-wide garbage collection drive molungtad sa lima hangtud pito ka adlaw, diin nagkahiusa ang pwersa sa mga truck gikan sa kabarangayan, City Engineering Office, City Public Services Department, City Local Environment and Natural Resources (CLENRO), apil ang gipahulam nga mga truck sa pamilyang Uy, aron mapadali ug mapaspasan ang pagkuha sa basura padulong sa city sanitary landfill. (CIO)