Kapin usa ka libo ka mga mag-uuma ning syudad nga naapektuhan sa El Niño o huwaw ang ilang kaumahan ug pananom sa niaging tuig ang nakadawat og P10 mil nga cash assistance matag usa adlaw’ng Huwebes, Enero 23, 2025 nga gipangulohan ni Mayor Klarex Uy.

 

Ang distribution gipasiugdahan sa Agricultural Productivity Operations Office (APOO) nga gipangulohan ni Engr.Paterno Gonzales, department manager sa maong buhatan.

 

Si Engr. Gonzales mipasabot nga ang assistance nga nagkantidad og P10 milyones maoy bunga sa paningkamot ni Mayor Klarex human kini gihatag ni President Ferdinand Marcos Jr., ngadto sa syudad pinaagi sa Presidential Assistance to Farmers, Fisherfolk and Families (PAFF).

 

Siya midugang nga nalangan ang paghatag sa cash assistance tungod sa makuti nga proseso diin giseguro sa ilang buhatan nga kadtong mga mag-uuma nga dako ang kadaut sa ilang pananom ang mahatagan.

 

Gani, sa iyang mensahe gidasig ni Mayor Klarex ang mga mag-uuma nga gamiton sa insakto ang kuwarta nga ilang nadawat ilabina nga mas duol kaniya ang mga mag-uuma kay sila ang instrumento nga adunay pagkaon ang katawhan.

 

Si Dinda Casipong sa Barangay Tuburan nga usa sa mga mag-uuma nga nakadawat namahayag dako na og tabang ang maong kantidad, gani ipalit niya kini og dugang binhi ingon man abono.

 

Siya mapasalamaton usab kang Mayor Klarex nga nagpakabana sa kahimtang sa mga mag-uuma ilabina sa mga naapektuhan sa milabay’ng El Niño. (ALR/CIO/Photos by Reynan Baylin/CIO)