MITUBAG gilayon sa panawagan ni Mayor Klarex Uy nga ‘city-wide garbage collection drive’ ang mga opisyales sa Brgy Bonbon karong buntag pinangulohan ni Punong Barangay Lelit B. Molina.

 

Kini human sa katiguman nga gipatawag ni Mayor Klarex ang mga punong barangay adlaw’ng Miyerkules aron matubag ang problema sa basura pinaagi sa hiniusang pwersa sa kabrangayan, syudad ug 3rd party garbage collector nga Tencil.

 

Atol sa maong katiguman, nagkahiusa ang tingog sa mga Kapitan ilabina ang mga adunay kaugalingong garbage trucks sa pagtabang sa syudad aron maangkon ang kahinlo sa palibot niini.

 

Basi sa Section 17 sa Republic Act 9003 or the Ecological Solid Waste Management Act of 2000 kini nagmando sa tanang barangay sa ilang nag-unang responsibilidad sa pag-segregate ug pagkuha sa mga basura ingon man pagbutang og Material Recovery Facility (MRF) sa ilang dapit. (ACM/CIO/FB Photos Lynde Salgados)