Tuesday, 04 February 2025 03:19

MAYOR KLAREX GIPANINGKAMOTAN MATIBAWAS ANG PAGATPAT PUBLIC MARKET HUMAN MIGAHIN ANG SYUDAD OG P30M

Written by
Gipaningkamotan ni City Mayor Rolando ‘Klarex’ A. Uy nga matibawas na karong tuiga ang pagtukod sa pampublikong merkado diha sa barangay Pagatpat ning syudad human migahin ang syudad og igong pundo balor P30 milyones alang sa Phase 2 sa maong proyekto.
 
Kini ang gipadayag ni Mayor Klarex ngadto sa mga katawhan ug opisyales sa barangay Pagatpat atol sa ‘Klarex nga Serbisyo sa Baryo’ nga gipahigayon niadtong Sabado, Pebrero 1.
 
Gani man, gikompirmar ni City Engineer Joel Momongan nga nasukip na sa 2025 annual budget sa kagamhanan ning syudad ang balor P30 milyones alang sa phase 2 sa nahisgutang proyekto.
 
Ang pamahayag gihimo sa mayor agi’g reaksyon sa pagbatikos sa iyang mga kaatbang sa politika nga matud pa wala atimana ug gipasagdan sa administrasyon ni Mayor Klarex Uy ang maong proyekto. (CIO)