SIGUN sa operasyon nga gihimo sa Night Market Management Committee (NMMC) sa Cogon Market area Huwebes sa gabii Peb. 5, 2025, adunay mga solusyon nga ipatuman uban sa Roads and Traffic Administration (RTA) sa tumong nga mahapsay ang dagan sa trapiko sa maong dapit.

 

Kini ang gibutyag ni Atty. Jose Edgardo Uy, head sa NMMC atol sa operation ug monitoring sa mga night market vendors human nakita nga adunay mga vendors nga nakasupak sa mga gabayan ug rules and regulations sa syudad.

 

Daghan sa mga vendors ang anaa na halos sa tunga sa dalan hinungdan nga naghuot ang dagan sa trapiko diin ubay-ubay sa mga pedestrian ug motorist ang nagreklamo.

 

Bisan gitugotan sila ni Mayor Rolando `Klarex’ Uy nga makabaligya ug makapanginabuhi daplin sa dalan apan adunay mga balaod nga gipatuman ang mayor sama sa dili pagpatunga sa dalan ilabina nga gihatagan sila sa lugar ug puwesto nga makabaligya.

 

Gani, kanunay naghangyo ug nanawagan si Mayor Klarex ngadto sa mga night market vendors nga sundon ang mga balaod sa syudad aron dili makaperhuwesyo sa mga motorista ug ang katawhan.

 

Apan nakita sa hiniusang Team sa NMMC ug sa Cagayan de Oro city Police Office (COCPO), CDRRMD, CEEBDA, RTA ug CLENRO nga daghan sa mga vendors ang nakasupak bisan pa man sa kanunay nga pagpahinumdum ug paghangyo.

 

Gipadayag ni Atty. Uy nga dili sayon ang pagpatuman nga mahapsay ang maong dapit apan naglaum ang Team nga magpabilin unta ang pagsinabtanay ug ang pagtinabangay kay kaayohan man kini sa tanan ug dili sa pipila lang ka grupo.

(ALR/CIO/Photos by Roel Felicitas/CIO)