Pormal nang gi-endorsar sa Regional Development Council (RDC-10) ang Comprehensive Land Use Plan kon CLUP sa dakbayan sa Cagayan de Oro atol sa ilang regular council meeting bag-ohay lamang, sumala pa ni City Administrator Atty. Roy Hilario Raagas atol sa flagraising ceremony sa city hall, adlaw’ng Lunes, Pebrero 10.

 

Si Atty. Raagas, kinsa maoy mirepresentar kang Mayor Rolando ‘Klarex’ Uy atol sa full council meeting, nagkanayon nga ang CLUP sa syudad gituboy sa RDC Land Use Committee kansang mga miyembro naglakip na sa mga kadagkoan sa national government line agencies, apil ang Department of Human Settlements and Urban Development (DHSUD).

 

Ang revision ug updating sa CLUP, nga nasulod sa tuig 2022 hangtud 2032 ubos sa pagpangulo ni City Planning and Development Officer Chedilyn Aissa Dulguime, gisugdan sa paglingkod ni Mayor Klarex sa City Hall niadtong 2022.

Dugang pa ni Raagas ang CLUP moagi una sa makuting review sa DHSUD central office ayha ang final approval sa maong ahensya.

 

Ang Comprehensive Land Use Plan usa ka importanteng dokumento nga magsilbing giya sa mga interesadong negosyante kung unsa nga klase sa negosyo ug asa kini ipahimutang nga dapit dinhi sa dakbayan sa Cagayan de Oro. (CIO file photos by SC and Jomar Figuracion)