MOKABAT sa 58,244 clients ang katibuk-ang naalagaran sukad gipahigayon sa kagamhanang lokal sa Cagayan de Oro ubos sa administrasyon ni Mayor Rolando ‘Klarex’ Uy ang SurUy-SurUy program: Klarex nga Serbisyo sa Panlawas sukad Pebrero 2024 hangtod Pebrero 2025.

 

Dumdoman nga gituyo pagmugna ang maong programa nga gipangunahan sa City Health Insurance Office, City Health Office, JR Borja General Hospital uban sa suporta sa Philhealth Region 10 agi’g paghatag og serbisyo medikal sa katawhan sa mga kabarangayan diin nag-unang programa ang Philhealth services, medical consultation, eye-care ug dental services, tuli, pagpanghatag og tambal ug uban pa.

 

Sa maong ihap 49,864 ka tawo ang mipaubos sa first patient encounter, 41,057 ang nagpakonsulta, 34,636 ang nahatagan og tambal.

 

Mapasalamaton si Mayor Klarex sa naglangkob sa SurUy-SurUy program diin naghatag kahigayonan sa katawhan nga libreng makapahimulos sa serbisyo sa gobyerno ilabina sa panlawas.

 

Ang SurUy-SurUy program hiniusang gipaluyohan sa CHIO, CHO, JRBGH, CDRRMD, CSWD, City Civil Registry, City Legal Office uban usab sa hugot nga suporta sa matag barangay. (AGP/CIO)