SA paningkamot sa pamunoan sa City College of Cagayan de Oro ubos sa administrasyon ni Mayor Rolando “Klarex” Uy alang sa katukoran sa main campus niini, gihan-ay na ang ‘structured development plan’ sa maong tunghaan aron masiguro ang sakto nga implementasyon sa maong proyekto.

 

Kini human gipahigayon ang pipila ka coordination meeting tali City College ug City Engineering Office kauban ang gimugna nga technical working group (TWG) alang sa aprobado na nga structural lay-out sa Phase 1 development.

 

Ang main campus sa city college pagatukoron sa luna nga gipanag-iya sa syudad nga nahimutang sa Sitio Mangalay, Brgy Dansolihon ning syudad nga gitugotan pinaagi sa City Ordinance No. 14986-2024. Ang maong luna napalit sa syudad alang sa katuyoan sa land banking ingon man ang pagtukod og resettlement ubos sa pagdumala City Housing and Urban Development Department (CHUDD).

 

Apan tungod sa nakitang kamahinungdanon sa edukasyon ilabina ang libreng kolehiyo sa syudad, gituki pag-usab ang maong luna uban sa konsultasyon ni Councilor Edgar Cabanlas kinsa mao usab ang chairman sa Committee on Urban and Rural Poor Housing Development.

 

Subay niini, giuyonan sa CHUDD ang maong katuyoan ug mihatag og letter of non-objection niadtong Disyembre 4, 2024 aron masugdan na gilayon ang maong proyekto.

 

Gipasabot usab ni Dr Jestoni P. Babia, City College of Cagayan de Oro President, nga human sa coordination meeting, ang initial construction maglangkob sa mosunod:

• One (1) administration building

• One (1) academic lecture building with 24 rooms

• One (1) dormitory alang sa mga studentyante

• One (1) dormitory alang sa faculty and staff

• One (1) oval

 

Subay niini, malaumon ang kadagkoan sa City College of Cagayan de Oro nga masugdan na sa dili madugay ang maong proyekto. (ACM/CIO/Photos by City College of Cagayan de Oro)