Subling giklaro sa Cagayan de Oro City Police Office (COCPO) nga walay insidente sa kidnapping nga natala dinhi sa Cagayan de Oro sulod sa milabay’ng tulo ka tuig.

 

Kini ang gitaho sa COCPO atol sa first quarter full council meeting sa City Peace, Development and Security Council (CPDSC) nga gidumala ni City Councilor Romeo Calizo isip council co-chairperson, Martes sa hapon, Marso 4 sa City Tourism Hall.

 

Sumala pa ni COCPO City Director Col. Salvador Radam nga sukad 2023 hangtud 2025, walay natala nga kidnapping incidents dinhi sa dakbayan basi sa sertipikasyon nga gipagula sa City Investigation and Detective Management Unit sa COCPO.

 

Gitumbok ni Col. Radam ang iresponsableng pag-post sa social media sa pipila ka mga indibidwal nga maoy hinungdan sa pagkatag sa giingong ‘kidnapping’ nga gakahitabo matud pa dinhi sa dakbayan sa Cagayan de Oro.

 

Tungod niini, gihangyo ni Col. Radam ang mga netizens nga likayan unta ang pag-share sa mga posts nga ‘fake news’ tungod kay ang pagsabwag sa maong mga taho nga walay igong basihan ug kamatuoran makahatag sa alarma ug kabalaka sa katawhan. (CIO/photos by Jomar Figuracion)