MISAKA ang gidaghanon sa mga negosyo ug patigayon nga nagparehistro dinhi sa dakbayan sa Cagayan de Oro sulod sa milabay’ng duha ka bulan ning tuiga.

 

Kini human gitaho ni Mr. Jason Adaza, hepe sa Business Permitting and Licensing Division sa City Mayor’s Office, nga miabot sa 25,905 ka mga permittees ang milukat og business permits gikan Enero 2 hangtud Marso 1 ning tuig.

 

Gitumbok ni Adaza nga ang pagsaka sa ihap sa mga rehistradong establisemento ug negosyo usa ka buhing timailhan nga lagsik ug kusgan ang ekonomiya sa Cagayan de Oro ubos sa pamunoan ni City Mayor Rolando ‘Klarex’ Uy.

 

Kini nga gidaghanon sa mga permittees karong tuiga misaka ngadto sa 2,002, kon 8.38 porsiyento ang pagtaas kung itandi sa nagparehistro sa tuig 2024 nga miabot sa 23,903 ka mga permittees, sumala pa ni Adaza.

 

Gawas pa niini, mitala usab og 1,612 ka mga bag-ong establisemento ang narehistro sa tuig 2025, mas taas kung ikomparar sa 1,481 sa tuig 2024.

 

Natapos ang extended deadline sa business permit registration and renewal sa kagamhanan ning syudad niadtong Pebrero 28 human gilugwayan ni Mayor Klarex ang deadline niadtong Enero 20 nunot sa hangyo sa mga negosyante ning syudad. (CIO/file photo)