LARAW sa City College of Cagayan de Oro (CCCDO) ang pagtanyag og college degree sama sa Social Work ug Business programs sa dili madugay.

 

Gibutyag ni City College President Dr Jestoni P. Babia, nga magtanyag ang city college sa maong mga kurso isip dugang sa kasamtangang gitanyag sa maong tunghaan.

 

Kasamtangang nagtanyag ang city college sat ulo ka 4-year degree courses nga mao ang Bachelor of Arts in Communication, Bachelor of Technical Vocational Teacher Education (BTVTED) ug Bachelor of Technology Livelihood Education (BTLED) nga nakadawat na sa Certificate of Program Compliance gikan sa Commission on Higher Education (CHED) bag-ohay lang.

 

Gipasabot usab ni Dr. Babia nga mahinungdanon ang pagsunod ug pagkompleto sa mga rekisitos diin mao kini ang nag-unang sumbanan alang sa pagkuha og CHED accreditation sa city college ug ikaduha na lamang ang katukoran sa main campus sanglit nakapadagan na man kini diha sa Agusan campus.

 

Matud ni Dr Babia, talagsaon ug labing unang city college nga nahatagan og COPC bisan pa man og halos usa ka tuig pa lamang kini gikan sa pagkamugna, sanglit kasagaran sa mga nag-apply alang sa COPC anaa na sa ilang ikaupat nga pagkahimugso.

 

Ang maong kadaogan sa city college nagpamatuod lamang sa lawom nga panglantaw niini nga maghatag og de kalidad ug sayon nga edukasyon sa mga Kagay-anon.

 

Subay niini, mapasalamaton usab ang city CCCDO sa Mayor Rolando “Klarex” Uy kansang liderato nahimong instrumento nga makabaton og libre’ng edukasyon ang kabatan-onan ingon man usab ang pasalamat sa city college kang Councilor Suzette Magtajas-Daba, chairman sa committee on Education sa 20th City Council sa makanunayong suporta ug paningkamot alang sa maong kalamboan. (ACM/CIO)