Normal lang nga transaksyon o’ proseso ang pagpagawas og kuarta sa gobyerno pinaagi sa cash advance.

 

Kini ang gipasabot ni Mr. Janboy Actub, ang tigpamaba ni City Mayor Klarex Uy, sukwahi sa alegasyon nga gigamit matud pa sa pipila ka mga opisyal sa city hall ang cash advance balor og P306 milyones alang sa personal ug politikanhong katuyoan.

 

Sumala pa ni Actub nga bakak ug walay kamatuoran ang maong alegasyon.

 

“Tungod kay panahon karon sa eleksyon, busa, dili na ikatingala nga daghan ang magbuhat-buhat sa mga isyu ug istorya nga walay kapasikaran aron lang pagdaot sa kredibilidad ug reputasyon sa usa ka kandidato, ilabina si Mayor Klarex Uy,” pamahayag sa spokesperson sa mayor.

 

Sigun pa ni Mr. Actub adunay tukmang proseso sa ‘proper accounting, auditing and liquidation’ nga gisita sa buhatan sa Commission on Audit kon COA subay sa nalatid sa MOA Circular 97-002.

 

Kini nga ‘government procedure’, sumala ni Actub ang gisunod ug gisubay sa nag-unang mga buhatan sa city hall sama sa City Budget Office, City Accounting Office ug City Finance Department kung adunay mag-cash advance.

 

“Naa man mga buhatan sa gobyerno nga mohatag sa ilang ‘audit findings’ kung adunay makit-an nga iregularidad sa paggamit sa kuarta sa gobyerno. Makalaum ang katawhan nga gigamit sa ensakto ang kuarta ug nakasunod sa proseso ug wala kini giwaldas o’ kaha gibulsa”, panapos ni Mr. Actub kimsa midugang pagpasabot nga 'bonded' ug 'accountable' ang si kinsa man nga mag-cash advance. (CIO)