Sugdan na sa City Assessment Department karong umaabot Hunyo 2 ning tuig ang paghatag og mga notices of property assessment alang sa mga residente sa Cagayan de Oro kinsa nanag-iya og mga kabtangan sa yuta, makinaryas ug gambalay.

 

Si City Assessor Atinodoro A. Asequia nagkanayon nga mohimo og house-to-house visit ang mga personahi sa City Assessment Department aron pag-deliver sa sobra 350 mil ka mga notices of property assessment.

 

Kini nga kalihukan gimando sa balaod subay sa proseso sa General Revision on Real Properties nga ipatuman sa kagamhanan ning syudad karong tuig 2026 pinasikad usab sa nalatid sa City Ordinance No. 14900-2024 kon ‘Revised schedule of market values of real property in Cagayan de Oro City’.

 

Gipasabot ni Mr. Asequia nga kasamtangan ‘undervalued’ kon ubos og bili ang buhis nga nakolekta sa syudad gikan sa real property tax (RPT) sulod sa milabay’ng 18 ka tuig tungod kay ang gibasihan niini mao man ang katapusang updating sa market values kaniadto pang tuig 2008.

 

Tungod niini, nangayo si Mr. Asequia sa pagsabot ug kooperasyon sa mga magbubuhis nga maapektohan sa bag-ong current and fair market values, sanglit ang labing makabenepisyo sa dakong pahat gikan sa RPT mao man ang sektor sa edukasyon pinaagi sa Special Education Fund (SEF). (CIO)