ALAYON sa kasaulogan sa International Day Against Drug Abuse and Illicit Trafficking (IDADAIT) 2025, ang City Anti-Drug Abuse Council (CADAC) nga gipangulohan ni Mayor Rolando `Klarex’ Uy nagpasiugda og Special Drug Education and National Security Seminar, Huwebes Hunyo 5, 2025, diha sa City Tourism Hall.

 

Ang kalihokan nga inabagan usab sa Dangerous Drug Board, Buhay Ingatan Droga’y Ayawan (BIDA) gisalmutan sa mga Community-Based Drug Rehabilitation Program managers, SK chairman, SK officials, barangay kagawad, Barangay Drug Abuse Council (BADAC) chairman gikan sa nagkadaiyang barangay sa District 1 ug District 2.

 

Sa iyang mensahe isip representante ni Mayor Klarex, gipadayag ni City Councilor Roger Abaday nga ang administrasyon ni Mayor Klarex naningkamot ug naninguha sa pagsugpo sa pagkuyanap sa gidiling druga diha sa pagpatuman sa mga programa pinaagi sa pagpalig-on sa edukasyon, mga adbokasiya ug uban pa.

 

Gipasabot ni Kag. Abaday nga dili lang isalig sa kapulisan, korte ug ubang ahensya ang pagsumpo niini, kinahanglan ang kooperasyon ug pakighiusa sa katawhan ilabina sa mga kabatan-onan.

 

Si City Councilor Romeo Calizo, CADAC co-chairman mihagit usab sa mga SK officials nga isip leader sa mga kabatan-onan sila ang magdumala sa komunidad nga dili makasulod ug sigurohon nga walay drug users ug drug pushers sa ilang barangay.

 

“As leaders of youth, you are always the hope of the city and community,” dugang ni Councilor Calizo.

 

Mihatag usab og lecture ang opisyal sa Philippine Air Force kalabot sa “National Security Threat: Recruitment of CPP-NPA-NDF to the youth”.

 

Lakip sa mitambong sa seminar ang mga representante ug opisyal sa buhatan sa DepEd, COCPO, City College, Inter-Faith, ug Parole and Probation. (ALR/CIO/Photos by Rod Constantino/CIO)