MAINITON nga gidawat sa kagamhanang lokal sa pagpangulo ni Mayor Rolando 'Klarex' Uy ang pag-abot sa mga langyaw nga beterano ug batan-ong atleta alang sa Sinag Liga Asya (SLA) Junior World Showcase.

 

Personal nga giabi-abi sa mga opisyales sa City Hall, uban ni City Administrator Atty. Roy Hilario Raagas, ang mga delegado gikan sa USA, Canada, ug uban pang nasud sa Asya sa ilang pag-abot sa Laguindingan Airport karong adlawa, Hulyo 4.

 

Adunay 36 ka international teams nga magtigi batok sa mga lokal nga grassroot players sa umaabot nga usa ka semanang torneyo nga magsugod karong Sabado, Hulyo 5. Ilang gidala ang Junior World Showcase sa Cagayan de Oro gikan Hulyo 5 hangtod 11.

 

Mismo si Mayor Klarex ang mihatag sa iyang dakong suporta kauban ni Carmen Punong Barangay Raineir Joaquin “Kikang” Uy diin nahimong host city ang dakbayan sa usa sa labing dagkong sporting events sa kasaysayan sa Cagayan de Oro.

 

Pinaagi sa paningkamot sa kagamhanang lokal inubanan sa City Sports Office ug City Tourism Office, gilauman nga mamahimong malampuson ang torneyo ug ipakita ang world-class basketball tournament. (MDS/CIO/PHOTOS BY: KIM ZALDIVAR/CIO)