GIPADAYAG sa mga opisyal sa Sinag Liga Asya (SLA) ang ilang dakong kalipay ug pasalamat kang Mayor Klarex Uy sa pagdawat ug sa suporta sa usa sa labing dakong sporting event sa syudad nga nagsugod karong adlawa.

 

Atol sa press conference gipadayag sa mga opisyal sa Sinag Liga Asya (SLA) ang tinud-anay nga tuyo ug tumong sa liga nga mao paghatag og kahigayonan sa mga batan-ong atleta nga mahatagan og higayon nga mapakita ang ilang kahanas ug madugangan pa kini pinaagi sa pakig-agbat sa nagkalain-laing basketball enthusiasts sa ubang nasud.

 

Gibuksan ang Sinag Liga Asya adlaw’ng Sabado sa USTP Gymnasium diin gisaksihan kini ni Brgy Carmen Chairman Raineir Joaquin “Kikang” Uy ingon man nila SLA President Ray Alao, Chief Operating Officer Leo Isaac, Chairman Rocky Chan, Commissioner Rodney Santos, ug International Vice President Erick Quintana.

 

Gipasalamatan ni SLA Chairman Quintana ang dakbayan sa Cagayan de Oro, ilabi na si Mayor Klarex Uy, tungod sa padayon nga suporta sukad pa sa paglusad sa maong kalihokan.

 

Si City Administrator Atty. Roy Hilario Raagas nagpadayag nga ang kagamhanang lokal maningkamot aron mapalambo ug padayong suportahan ang mga susamang aktibidad alang sa mga Kagay-anon nga mahiligon sa sports.

 

Gisugdan sa SLA ang paghatag og higayon sa mga players nga 40 anyos pataas nga wala makaduwa kaniadto ug karon ilang gihatagan usab og pagtagad ang mga batan-ong atleta.

 

Ang Junior World Showcase nagpakita sa mga atleta gikan sa langyaw nga adunay dugo nga Pinoy batok sa mga lokal nga grassroots players diin tumong sa SLA mahimong sentro sa pagpalambo sa umaabot nga mga henerasyon sa basketball stars. (MDS/CIO/Photos by Kim Zaldivar/CIO)