SULOD sa 22 ka tuig nga natukod ang Carmen market, nabutangan na gayud kini og waste water treatment facility ubos sa administrasyon ug paningkamot ni Mayor Rolando `Klarex’ Uy.

 

Ug magamit na kini human gi-turnover adlaw’ng Martes Hulyo 8, 2025, sa pagpangulo ni Mayor Klarex, Department of Environment and Natural Resources – Environmental Management Bureau Regional Director Reynaldo Digamo, City Economic Enterprises and Business Development Administration General Manager Atty. Marianne Ragas ug Punong Barangay Raineir Joaquin “KapKik” Uy sa Barangay Carmen.

 

Sa iyang mensahe, gipasalamatan ug gidayeg ni Dir. Digamo si Mayor Klarex nga gisugdan niya pagtubag ang isyu sa kinaiyahan ug pagsunod sa Clean Water Act of 2004 ingon man pag-ila sa urgent needs sa waste water treatment facility.

 

Si Mayor Klarex mipadayag nga sa kanunay iyang gipaningkamutan nga maatiman ang maayong panglawas sa katawhan aron sa ingon mahimo sila nga produktibo pinaagi sa pag-atiman sa isyu sa kinaiyahan.

 

Sa sunod bulan ang waste water treatment facility na usab sa Cogon market ang gikatakdang ma-turnover.

 

Ang kalihokan gitambongan usab nila ni City Councilors Roger Abaday ug Enrico Salcedo, Juancho Pascual, City Administrator Atty. Roy Hilario Raagas, mga barangay kagawad sa Barangay Carmen, city hall department managers, mga opisyales sa Carmen Market United Vendors Association (CUVA), ug ang contractor sa proyekto. (ALR/CIO/Photos by Augusto Cañete/Roel Felicitas/Johnel Neri/CIO)