GIABI-ABI ni Mayor Klarex Uy ang bag-ong nadugang nga city scholars, atol sa waitlisted applicants’ assembly, Hulyo 10, diha sa Capitol University Gymnasium, ning siyudad.

 

Atol sa kalihokan, gipalabi ni Mayor Klarex Uy ang pangandoy sa mga applicants nga dili mapalong ang paglaum nga maka-eskwela bisan kini wala mi-qualify sa city scholarship application.

 

“Kung wala ko nag-hunahuna sa inyong kaugmaon ug pangandoy sa ginikanan, sa inyong kapakyasan nga wala mo kapasar dili namo balibalihon kay gihatagan namo og higayon apan dili ko gusto nga ang inyong paglaum ako ang hinungdan nga mapalong kini,” saysay ni Mayor Klarex Uy.

 

Dugang niini, gipahinumdoman ni Mayor Klarex nga dili usikan ang higayon sa pagdawat sa scholarsip ingon nga kini usa ka talagsaon nga oportunidad.

 

"Ang higayon bilihon gyud busa kaninyong mga kabatan-onan, ayaw usiki ang laing higayon nga akong gihatag kaninyo sa pagdawat ug pagpadayun sa programa sa atong scholars," dugang sa mayor.

 

Sa laing bahin, mitambong usab sa kalihokan sila si bag-ong Chairperson sa Committee on Education City Councilor Moreno ‘Jing’ Daba IV uban ni kanhi Committee on Education Chairperson City Councilor Suzette Magtajas-Daba kinsa mao’y mi-author sa City Scholarship Code of 2018, mga personahe sa PHINMA-COC, mga personahe sa City Education and Development Office (CEDO) pinangunahan ni CEDO Department Manager Richel Petalcurin-Dahay, mga personahe sa City Mayor’s Office.

 

Mokabat sa 630 ka waitlisted applicants uban sa ilang mga ginikanan ang misalmot sa unang batch sa waitlisted applicants’ assembly ning adlawa.

 

Nasayran nga ang mga bag-ong nadawat nga city scholars motungha sa PHINMA-Cagayan de Oro College kon PHINMA-COC diin ang PHINMA-COC mao'y mo-shoulder sa 75% niini nga pagalangkoban sa libreng tuition, miscellaneous fees ug laboratory fees samtang 25% ang i-cover usab sa LGU-CDO.

 

Ang waitlisted applicants’ assembly ning adlawa usa ka pakigtambayayong sa PHINMA-COC ug ni Mayor Klarex diin gitawag og HKMKU scholarship program kansang tumong ang paghatag og higayon nga makaeskwela kadtong mga city scholar applicants nga wala mi-qualify sa city scholarship program application ug mga Out-of-school Youth. (NLB/CIO/photos by Kim Zaldivar/CIO)