GIHATAGAN sa syudad ubos sa administrasyon ni Mayor Rolando `Klarex’ Uy pinaagi ni Majority Floor Leader City Councilor Edgar Cabanlas, committee chair sa City Economic Enterprises and Business Development Administration (CEEBDA) og duha ka bulan ang mga stallholders sa Cogon market nga manglimpyo ang ilang puwesto isip ilang responsibilidad.

 

Kini ang hagit ug pasidaan ni Kag. Cabanlas ngadto sa mga section ug block officers, stallholders ug opisyales sa Cogon Market United Vendors Association (CUMVA) partikular na sa may Capt. Vicente Roa nga bahin sa merkado atol sa meeting uban ni CEEBDA General Manager Atty. Mariaane G. Ragas adlaw’ng Martes, Hulyo 15, 2025.

 

Siya namahayag nga usa ka pribilihiyo ug dili katungod sa mga vendors/stallholders nga nakabaton og puwesto sa merkado diin mahimo kining bawion kon aduna silay nalapas nga mga balaod.

 

Ang maong portion maoy himoon nga pilot project ni Kag. Cabanlas nga masugdan ug mamintinar ang kalimpyo sa Cogon market.

 

Kini nga inisyatibo nahimo human na-obserbahan ug nakita ni Mayor Klarex ang kahugaw sa Cogon market hinungdan nga iyang gihagit ang mga kadagkoan sa CEEBDA nga mohimo og mga lakang kalabot niini.

 

Samtang nauyonan usab sa CEEBDA, Tensil, laborers, garbage collector ug mga stallholders ang oras sa pagkuha sa ilang mga basura nga magsugod gikan 7:00 AM-10:00 AM, ug 7:00PM-10:00PM.

 

Usa kini ka hiniusang desisyon tali sa mga stakeholders nga gihatagan sa pagsabot ug pagtagad ni Atty. Ragas aron walay mapasagdan nga grupo labina sa labor group nga maoy ilang panginabuhi.

 

Lakip sa mitambong sa meeting ang Task Force Oro, Cagayan de Oro City Police Office (Cocpo), Bureau of Fire Protection (BFP), Roads and Traffic Administration (RTA), representative sa 858 ug uban pa nga mga stakeholders. (ALR/CIO/Photos by Reynan Baylin/CIO)