GIHAN-AY na sa kagamhanang lokal ubos sa administrasyon ni Mayor Rolando ‘Klarex’ Uy ang mga kalihokan alang sa umaabot nga Higalaay Festival 2025 karong bulan sa Agosto, agi’g pagtamod sa kapistahan ni Senyor San Agustin ang patron sa Cagayan de Oro.

 

Atol sa gipahigayong tigom karong adlawa, Hulyo 15, 2025 nga gipangulohan sa City Tourism and Cultural Affairs Office, gituki ang naglangkob sa proposed Cagayan de Oro Fiesta Committee diin ang chairperson si Mayor Klarex ug mahimong co-chair si chief of staff Ms Sheila Lumbatan ug co-chair usab si City Councilor Joyleen Balaba, kinsa nangulo sa Committee on Tourism sa 21st City Council.

 

Ang Higalaay Festival naka-angkla usab sa kasaulogan sa 75th Diamond Jubilee sa pagkahimugso sa syudad dala ang tema, “Mapasigarbuhon sa Kagikan, Madasigon sa mga damgo”.

 

Gisiguro ni Mayor Klarex nga gawas sa kasadya, maduso usab ang spirituhanon ug kulturanhong bili sa kapistahan.

 

Lakip gihisgutan ang mga core, major ug minor events ingon man ang pagsiguro nga luwas ug malinawon ang mga kalihokan. (AGP/Photos by Harry Tibon/CIO)