Gidominar sa mga boksidor sa RISE CDO Boxing Team ang ilang mga kaatbang ibabaw sa ring human mikulit og pito ka kadaugan sa unang adlaw sa ilang pagsalmot sa Sandugo sa Bohol Boxing Championships, adlaw’ng Huwebes, Hulyo 16 sa Jagna Cultural Center sa Jagna, Bohol.

 

Ang unang kadaogan, sigun ni RISE CDO head coach Elmer Pamisa, naangkon ni Airon Badiang human gipaundang sa referee (referee stopped contest-RSC) ang iyang kaatbang nga si Jan Steve Inlajusta sa Tagbilaran sulod sa second round sa ilang dula sa school boys 37-40 kgs category.

 

Dugang pa ni coach Pamisa midaug usab nga wala na makapatulo og singot si Jobert Abragan sa junior boys 46-48 kgs category tungod sa walkover decision human wala na modayon og saka sa ring ang iyang kontra nga taga-Pilar, Bohol.

 

Nagmadaogan usab si Gabriel Caranay sa unanimous decision, 5-0, sa junior boys 48-50 kgs category batok kang Kenrad Bajade sa Jagna, samtang winner on points, 3-2, ang naangkon ni Albert Barsabal kontra kang Mark Anthony Luna sa Zamboanga sa junior boys 50-52 kgs category, matud ni Pamisa.

 

Nagmalampuson usab sa iyang away si Ivan Llaban kontra kang Benjie Butron sa Pilar pinaagi sa referee stopped contest-RSC sulod sa second round sa youth men 45-51 kgs category, samtang unanimous decision win, 5-0, ang nakuha ni Christian Jake Pores batok kang John Reuel Butal nga taga-Pilar, si Pamisa nagkanayon.

 

Gibutyag ni Pamisa nga impresibo usab ang gipakitang kadaogan ni Car Jay Emata human gipalukapa ang iyang kaatbang nga si Joey Macalandang sa Danao sulod lang sa unang round (referee stopped contest-RSC) sa ilang away sa youth men 54-57 kgs category.

 

Hinoon, duha ka mga boksidor sa syudad nga sila si Matt Padegus ug Reneir Albaracine, ang pakyas nga maka-abante sa sunod round human napildi sa ilang tagsa-tagsa ka dula sa elimination round.

 

Ang partisipasyon sa RISE CDO Boxing Team sa maong torneyo suportado ni Mayor Rolando ‘Klarex’ Uy, pinaagi sa City Sports Development Office ubos sa pagdumala ni City Sports Coordinator Allby Cris ‘Bheng’ Waga. (CIO/photos courtesy of Coach Pamisa)