Upat ka mga boksidor sa RISE CDO Amateur Boxing Team ang sigurado na nga makaangkon og bronze medals sa nagpadayong Sandugo sa Bohol Boxing Championships sa Jagna Cultural Center sa Jagna, Bohol.

 

Kini human gitaho ni RISE CDO boxing team head coach Elmer Pamisa nga nagmadaogon sa ilang dula sila si Aaron Badiang (school boys 37-40 kgs category), Ivan Llaban (school boys 43-46 kgs category), Christian Jake Pores (youth men 48-51 kgs category), ug Aljep de Lima (youth men 51-54 kgs category) atol sa quarterfinal rounds, Huwebes, Hulyo 17.

 

Tungod sa ilang kalampusan, miabante na sa semifinal round, diin sigurado nang makaangkon og bronze medals ang upat ka boksidor sa Cagayan de Oro City Amateur Boxing Team.

 

Nasungkit ni Badiang ang kadaogan human gipildi si Rico Cuas sa Carmen pinaagi sa unanimous decision, 5-0, samtang midaug usab si Llaban kontra kang Ian Jake Galero sa Alicia pinaagi sa referee stopped contest-RSC decision sa round 2 sa ilang dula.

 

Nagpabiling limpyo ang record ni Pores human nag-walkover ang kaatbang niini nga si Kyle Gonzales sa Carmen, samtang winner on points, 5-0, ang naangkon ni de Lima batok kang Ronnie Tamsi sa Guindulman.

 

Positibo si coach Pamisa nga magpadayon ang maayong dula sa mga boksidor sa syudad hangtud sa championship round, dungan ang pagpasalamat sa suporta ni Mayor Klarex Uy, pinaagi sa buhatan ni City Sports Coordinator Allby Cris ‘Bheng’ Waga. (CIO/photos by Coach Pamisa)