Nahimong overall champion ang Cagayan de Oro Riser Amateur Boxing Team human nasungkit ang 11 ka gold, tulo ka silver ug lima ka bronze medals sa bag-ohay natapos nga Sandugo sa Bohol Boxing Championships, Hulyo 16-20 sa Jagna Cultural Center sa Jagna, Bohol.

 

Ang 11 ka boksidor nga misakmit og gold medal mao sila si Airon Badiang (37-40 kgs), Gold Honeyper Bagobo (43-46 kgs), Gabriel Caranay (48-50 kgs), Albert Bersabal (52 kgs), Richniel Tutor (57 kgs), Ivan Llaban (45-48 kgs), Christian Jake Pores (51 kgs), Aljep de Lima (54 kgs), Argie Reyes (60 kgs), Merry Jane Resonescion (women’s 48-50 kgs) ug Princess Anne Aranzo ( women’s 50-52 kgs), sumala sa taho ni CDO Riser Boxing Team head coach Elmer Pamisa.

 

Ang mihakot og tulo ka silver medals mao sila si Jobert Abragan (48 kgs), Alex Padernal (57 kgs) ug Stanley Young (67 kgs), samtang ang lima ka bronze medalists mao sila si Richard Payla, Mark Sabiahan, Morgy Alas, Jason Apoya ug Princess Baguio, dugang pa ni coach Pamisa.

 

Tungod sa maong kalampusan, dako ang pasalamat ni coach Pamisa sa kusganong suporta sa administrasyon ni Mayor Klarex Uy pinaagi ni City Sports Development Coordinator Allby Cris 'Bheng' Waga, sanglit ang partisipasyon sa boxing team sa syudad nakahatag og talagsaong exposure sa mga batan-ong boksidor nga mapakita ang ilang abilidad sa natad sa boksing, gawas sa pagdala sa ngalan ug dungog sa dakbayan sa Cagayan de Oro. (CIO/photos by coach Pamisa)